Motivate News

मदन भण्डारीलाई उच्चस्थरको सम्मान दिएर शुशिलको अपमान भो : सांसद मल्ल

काठमाडौँ – वि.सं. २०१० सालमा सल्यानमा जन्मिएकी मीठू शाह रुकुममा पुगेर मल्ल हुँदा नेपाली कांग्रेसको पहिचान पनि सँगै बोकेकी थिइन् । गर्भे कांग्रेस मीठू जन्मघरमा बुवाको राजनीतिबाट प्रेरित थिइन् त कर्मघरमा श्रीमान स्वयं कांग्रेसको राजनीतिमा होमिएका थिए । प्रतिबन्धितकालमा जता गए पनि डरै डरका बीच निडर भएर कांग्रेसको पुच्छर समात्न नछाडेकी मीठूलाई रुकुमबाट पहिलोपल्ट समानुपातिक सभासद हुने मौका दियो पार्टीले । अहिले उनी सभासदको भूमिकाबाट मुक्त हुँदै सांसदको भूमिकामा रहेर रुकुमको विकास निर्माण र जनजागरणका लागि सक्रिय विधायक तथा विकासे प्रतिनिधि भएकी छन् । उनै सांसद मीठूसँग सहकर्मी  बबरजङ्ग थापाले केहि कुराकानी गरेका छन् । प्रस्तुत छ सोहि कुराकानीको साम्पादित अंस ।

माननीयज्यू, तपाईं कांग्रेस राजनीतिमा लागेको कति भयो ?

म त गर्भे कांग्रेस हुँ । मेरो बुवा वि.सं. २००७ सालमा जेलमा पर्नुभएको थियो र म वि.सं. २०१० सालमा जन्मेको । त्यसैले दायाँ–बायाँ जान्दिन, कम्युनिष्टको पृष्ठभूमि थाहा छैन म काङ्ग्रेस हुँ ।

हालचालकै राजनीतिक परिस्थितिको कुरा गरौं, नेपाली कांग्रेस र माओवादी केन्द्रले वर्तमान सरकारविरुद्घ अविश्वासको प्रस्ताव संसदमा दर्ता गराएका छन्, एमालेले उक्त प्रस्तावको सामना गर्ने बताएको छ अबको राजनीति कसरी अगाडि बढ्छ त ?

नेपाली कांग्रेसलाई नेपाली जनताले एक नम्बर पार्टी बनाएर पठाएका हुन् । तर पनि हाम्रो अहिले सरकारमा जाने चाहना होइन, सत्तासीन पार्टी माओवादी केन्द्रले सरकारबाट समर्थन फिर्ता लिएर सहयोग मागेपछि साथ दिनु परेको हो । यो परिस्थितिले बनेको कुरा हो । हामी सरकार परिवर्तन गर्नुपर्छ भनेर गएको होइन ।

संविधान कार्यान्वयन गर्न त सबै दलहरु मिल्नुपर्र्ने हो यस्तो होला जस्तो देखिदैन किन ?

संविधान जारी गर्दा स्वर्गीय सुशील कोइरालाको नेतृत्वमा सरकार थियो । तर पनि तीन दल एकतावद्घ भएर नै संविधान आएको हो । अहिले संविधान कार्यान्वयन गर्न मुख्य गरी तीन दल मिल्नु नै पर्छ । कांग्रेसले मात्र सकारात्मक भूमिका खेलेर भएन अरु ठूला पार्टी एमाले, माओवादी केन्द्र लगायत सम्पूर्ण साना दलहरुले पनि सकारात्मक भूमिका खेल्नु प¥यो । संविधान कार्यान्वयनमा लैजान, नयाँ नियम बनाउन बाँकी नै छ । अरु तीन तहको निर्वाचन गराउनु पर्नेछ ।

यो चालाले संविधान कार्यान्वयन होला जस्तो त देखिएन नि ?

सहमति हुनु पर्छ । हाम्रो पार्टीको नीति त सहकार्य, सहमति र मेलमिलापबाटै अगाडि जानुपर्छ भन्ने हो मुठभेडमा जानु हुँदैन । एकताबद्घ भएर जानु पर्दछ । सरकारमा जाने त दोस्रो कुरा हो । सरकारमा को जान्छ, को जाँदैन त्यो मुख्य बिषय होइन । मूल विषय त जनताको प्रतिनिधि भएको हुनाले जनताको काम गर्नु पर्दछ भन्ने हो ।

केन्द्रमा सधैँ यस्तो राजनितिक अन्योल भएपछि तपाईंहरूजस्ता जनताका प्रतिनिधिले जनताका र विकास निर्माणका काम गर्न गाह्रो भयो होला है ?

हाम्रो नेपालमा सरकारमा जाने मन्त्रीहरु, नेताहरु निर्वाचन क्षेत्रमुखी, पार्टीमुखी, जिल्लामुखी हुनुहुन्छ, त्यसो हुँदा विकास निर्माणका काममा पटक पटक अवरोध हुन्छ । तर पनि हामीहरु लागिरहेका छौँ जनता र विकासको काम गर्ने सवालमा मेरो प्रयास जारी छ ।

तपाईं जत्तिका सांसदले त नेताहरूप्रति त्यसो भन्नुहुन्छ, सर्वसाधारणले के भन्छन् होला ? के गर्न सक्छन् होला ?

यो एकदमै सही कुरा हो । म त रोस्टममै गएर भनेकी छु, यो अन्याय भयो । आपूmहरूको क्षेत्रमा बजेट थुपार्ने, हाम्रोमा बेवास्ता गर्ने भनेर ।

रुकुम पनि माओवादी द्वन्द्वमा निकै फँसेको जिल्ला हो, अहिले त्यहाँ काम गर्ने अवस्था कस्तो छ ?

यस जिल्लामा तत्कालीन माओवादीले २०५२ सालमा जनयुद्ध सुरुवात गर्दा रुकुमको सिस्ने गाविस र रोल्पाको जलजला गाविसलाई सिज अभियान भनी सुरु गरेका हुन् । यी दुई ठाउँ बढी नै द्वन्द्वपीडित गाविस हुन् । माओवादी पार्टी जतिपटक सरकारमा गयो त्यति पटक रुकुमले मन्त्री पाइहाल्छ ।

हामी रुकुममा काङ्ग्रेस माओवादी गरी ४ जना सांसद छौं । रुकुमको विकास निर्माणमा हामीले काङ्ग्रेस र माओवादी भए पनि एउटै धारणा बनाएर मतैक्य गरेर अघि बढेका छौं । हामी एक छौं । पार्टी भन्ने त चुनावमा हो । हाम्रो नीति र सिद्धान्त फरक होला तर जनताको सेवा गर्ने र विकास गर्ने काममा पार्टी फरक भन्दैमा विमति किन चाहियो भन्ने भावनाले काम गरेका छौं ।

माओवादी जनयुद्धले रुकुम र रोल्पा जस्ता जिल्लामा महिलाहरूमा पनि व्यापक जागरण ल्यायो भनिन्छ, वास्तवमा त्यहाँका महिलाको अवस्था कस्तो छ ?

रुकुम विकास र चेतनाका हिसाबले पछि परेकै जिल्ला हो । त्यो युद्धको प्रभाव भन्दा पनि उठ्ने उठे र उठेकै छन् । कसैलाई पीडा पनि छ । रुकुमको मात्र के कुरा गर्नु, काठमाडौंमा पनि कतिपय महिलाको अवस्था दयनीय नै छ । देशैभरिमा यस्तो अवस्था छ । महिला हिंसामुक्त जिल्ला भन्न सकिने अवस्था कहिंको पनि छैन । जनयुद्धले भन्दा पनि पारिवारिक अवस्था, लगनशिलता र चेतनाबाट केही अघि बढेका छन्, केही त्यसैको अभावबाट पछि परेका छन् भन्ने लाग्छ मलाई ।

तपाईं लामो समयसम्म नेपाली कांग्रेसमा सङ्घर्ष गर्नुभयो, अहिले सांसद बन्दा कस्तो अनुभूति भएको छ ?

मेरो सम्पूर्ण लगानी काङ्ग्रेसमा छ । हो, मैले पार्टीमा धेरै सङ्घर्ष गरें । अझ बाबुको पालादेखिको लगानी हो मेरो । माईतीतिर पनि घरतिर पनि सबै काङ्ग्रेस हौं र छौं हामीहरू । मैले पार्टीबाट लिन भन्दा पनि जीवनमा धेरै दिएँ हुँला जस्तो लाग्छ । यति लामो सङ्घर्षपछि माननीय भएपछि खुसी हुनु स्वाभाविकै हो ।

हाल नेपाली कांग्रेस र माओवादीबीच सात बुँदे समझदारी हुँदा मधेशी समस्या समाधान गर्ने भनी पहिलो बुँदामा नै उल्लेख गरिएको छ । के नयाँ सरकार बनेपछि त्यो समस्या समाधान होला ?

त्यो कुरा नेताहरूले गर्नु भएको छ । हामी हिमाल, पहाड तराई मिलेर बस्नुपर्दछ, आन्दोलन गरेर होइन । हामी अहिले धार्मिक र जातीय नारातिर गइयो भने हानी गर्दछ । मधेशका मुद्दा बार्तावाट मिलाएर अगाडि बढ्नु पर्दछ । हिमाल, पहाड तराई मिलेर अगाडि बढ्नु पर्दछ । को क्षेत्री को बाहुन को ठकुृरी को दलित को मधेशी सबै मिल्नु पर्दछ । द्वन्द्वले देशलाई राम्रो गर्दैन । जातियता र क्षेत्रीयताको भावनाले देशलाई नोक्सानी गर्दछ ।

पार्टीमा तपाईंले ठूलो योगदान गर्नु भएको रहेछ, पारिवारिक पृष्ठभूमिमा माइतीदेखि लिएर घरसम्म दुवैतिरबाट यति ठूलो योगदान गरेको मान्छे मन्त्री बन्ने चलखेलमा लाग्नु भएको छ कि छैन ? कसैले त तपाईंभन्दा धेरै पछि पार्टीमा लागेर पनि मन्त्री खाएको खाएै छन् नि ?

नेपाल सतिको श्राप परेको ठाउँ हो । म त्यस्तो कसरतमा पनि छैन । तर पार्टीले सही सोचेर मलाई कुनै मन्त्रालयको जिम्मेवारी दिन चाह्यो भने म पछि हट्नु पर्ने कारण रहन्न । नेपाली सम्पुर्ण दाजुभाइ दिदी– बहिनीले खासगरी रुकुमेली जनताले यस्तो यस्तो गर्नु प¥यो भन्दा गर्ने मान्छे हुँ । मलाई कुनै कुरामा लोभ छैन ।

विपक्षी पार्टीले जति राम्रो काम गरे पनि विरोध गर्ने आफ्नो पार्टीले काम गर्न नसके पनि ठिकै हुने प्रवृतिले कहिले देशको विकास होला ?

सत्तामा बस्ने मानिसको आँखा सत्तामा मात्र हुने प्रवृति गलत हो । पहिला केपी ओलीको बोली गोली भन्ने गरिन्थ्यो, जनताहरुले पनि उनीसँग धेरै आशा गरेका हुन् । तर अहिले उनी भाषण शिरोमणी जस्तो लाग्दछ । राम्रोलाई राम्रो र नराम्रोलाई नराम्रो भन्नु पर्दछ भन्ने मान्यता मैले पनि राख्दछु । अहिले के.पी सरकारको जो अल्पमतमा परेको सरकार आफै साइड लाग्नुपर्ने हो । माओवादीले समर्थन फिर्ता लिईसकेपछि त यो सरकार ढलिसक्यो भने हुने अवस्थामा पनि सरकार नछोड्ने के.पी. ओलीको प्रवृति कस्तो हो ! यिनका कुरा बुभ्mनै सकिएन ।

कांग्रेसमा पनि रामचन्द्र र शेरबहादुर बीच प्रधानमन्त्री बन्न प्रतिस्पर्धा छ भन्छन् नि ?

काङ्गे्रसमा त्यस्तो कुनै विवाद छैन । सम्पूर्ण पार्टी एक ढिक्का छ । रामचन्द्र र शेरबहादुर दाइलाई एमालेबाट आएको प्रस्ताव अस्वीकार गरेको भन्ने तपाईहरुकै मिडियाबाट पढ्यौ ।

प्रधानमन्त्री के.पी ओलीले त यो सरकार परिवर्तन गर्न देशी विदेशीको ठूलो षडयन्त्र छ भन्नु भएको छ त्यस्तो होला त ? 

यो झुठा आरोप हो । उहाँ अहिले टेको नभएर ढलेको केराको थाम जस्तै हुनुभएको छ । उहाँले अनेक उखान टुक्का जोडेर जे पनि भन्नुहुन्छ । त्यसैले यसलाई अझ मिलाएर यो सरकार टेको नभएर ढलेजस्तै हो भन्न सकिन्छ ।

महिलाको विषयमा तपाईले संसदमा के कस्तो आवाज उठाउनु भयो ?

महिलाको विषयमा राजदूत नियुक्ति गर्दा महिला खै भनी रोस्टमबाटै मैले आवाज उठाएँ । सचिव हुने बेला महिलालाई सचिव किन नबनाएको भन्ने आवाज उठाएँ ।स्वास्थ्य मन्त्रालयमा एक नम्वरमा रहेकी महिला सहसचिवलाई सचिव नबनाई पुरुषलाई बनाइयो । महिला भएकै कारण किन पछि पारिएको हो ? भनेर प्रश्न तेस्र्याएँ ।

महिला हिंसा अन्त्यको कुरा पनि उठाएकी छु मैले । जिल्लामा महिला संजालमा काम गरेको लामो अनुभव छ । जिल्लादेखि केन्द्रसम्म महिलाको पीडामा म प्रत्यक्ष संलग्न छु । महिलाको बारेमा केही गर्न सकिएन भने महिला उत्थान हुन सकेन भने म माननीय भएको पनि व्यर्थ हुन्छ ।

सांसद हुनुको पिडा र खुसी बताइदिनुस् न ?

लामो सङघर्ष गरी सांसद हुुँदा खुसी हुने कुरा त भयो नै । हाम्रो जननायक वी.पी. कोइरालाले संविधानसभाको कल्पना गर्नुभएको थियो । अहिले हामीले संविधान जारी ग¥यौं त्यस मानेमा खुसी लाग्यो । संविधान अझै कार्यान्वयन भएको छैन त्यसमा दुःख लाग्ने कुरा भयो । छिट्टै कार्यान्वयन हुनेमा आशावादी छौं ।

रुकुममा नेपाली काङ्ग्रेसकोे अवस्था कस्तो छ ?

रुकुम जिल्लामा नेपाली काङ्ग्रेसको अवस्था रामै्र छ, हामी एक छांै । संसदमा २०४८ मा १ सिट २०५१ मा २ सिट र २०५६ मा १ सिट जित्दै आएको थियो । संविधानसभा चुनावमा प्रत्यक्षमा आउन सकेनौं । केही प्राविधिक र कतिपय हाम्रै कारणले गर्दा त्यस्तो हुन गयो त्यो समीक्षाको विषय हो । तर पनि संगठन राम्रो छ, हामीहरु एक भएर जानुपर्दछ ।

युवाशक्तिलाई खाडी मूलुकको भयानक तापक्रम, अभाव र कामको दबाबबाट बचाउन तपाईको भुमिका के हुन्छ ?

यो वास्तविक र मार्मिक प्रश्न हो । समग्र देशको कुरा छोडौं रुकुमको मात्र हप्तामा २ बटा लाश विदेशबाट आएको हुन्छ । लाश हेर्दा मलाई त कति पीडा हुन्छ भने परिवारलाई कस्तो हुन्छ होला, म कल्पना पनि गर्न सक्दिन । युवालाई विदेश जानबाट रोक्न देशमै केही गर्ने वातावरण मिलाउनु पर्छ ।

अझ रुकुम जस्ता ठाउँमा त जनचेतनाका कार्यक्रम ल्याउनु पर्दछ । मैले धेरै भाइ–बहिनीहरुलाई भन्ने गर्दछु विदेश नजाउ, नेपालमै केही गर भन्दा उनीहरुले भन्छन्– यहाँ पैसा बचत नै हुँदैन । म त मंसिर पुसमा मेरो जिल्लामै गएर यस सम्बन्धी जनचेतना नै गर्ने कार्यक्रमको योजना बनाएकी छु । गाउँमा युवायुवती छैनन् बुढाबुढीहरु मात्रै छन्, यसले समस्या ल्याएको छ ।

तपाईंले रुकुममा विकास निर्माणसम्बन्धी के के काम गर्नुभयो ?

रुकुम जिल्लामा विकासका कुरा गर्दा तपसेरा–ढोरपाटन बाग्लुङसँग समेटेकोले त्यहाँसम्म बाटो पु¥याउने कार्यदेखि लिएर अन्य बाटो–घाटो सहायक बाटा धेरै भएका छन् । धेरै पुराना मठ–मन्दिर, स्कुल आदिमा मेरो सांसद कोषबाट यस्तै यस्तैमा खर्च गर्ने गरेकी छु ।

अन्त्यमा, भन्न मन लागेका अरु केही कुरा छन् कि ?

भर्खरै सम्पन्न जननायक वी.पी. कोइरालाको ३४औं स्मृति दिवशका अवसरमा उहाँप्रति हार्दिक श्रद्धासुमन अर्पण गर्दछु । हामी नेपाली काङ्ग्रेसका कार्यकर्ताहरू उहाँका सन्तान हौं भन्ने मलाई लाग्छ । जब जब देशलाई अप्ठेरो पर्छ तब तब नेपाली काङ्ग्रेसको भूमिका महत्त्वपूर्ण हुँदै र रहँदै आएको छ, गणतन्त्र ल्याउनमा पनि काङ्ग्रेसको मुख्य भूमिका छ । वी.पी. कोइरालाले गर्दा नै यो देशको प्रगति भएको हो ।

वी.पी.ले नै नेपालीलाई रैतिबाट जनता बनाउनु भएको हो । राष्ट्रिय सम्मानमा मदन भण्डारीलाई सबैभन्दा माथिल्लो नेताका रूपमा विभूषित गरेर वी.पी., सुवर्ण, गणेशमान, कृष्णप्रसाद , गिरिजाप्रसाद र सुशील कोइरालाजस्ता नेताको अपमान गर्ने काम भएको छ, त्यसमा पनि हाम्रो घोर आपत्ति छ भन्न चाहन्छु ।

नयाँ संविधानका निर्माणका प्रमुख व्यक्ति सुशील कोइरालालाई मदन भण्डारीभन्दा तल पारेर दिइएको मानपद्वी लिनुहुन्न काङ्ग्रेसले भन्ने मेरो अभिमत छ । मदन भण्डारीले आफ्नो पार्टीका लागि ठूलै काम गर्नुभए होला तर देशका लागि त काङ्ग्रेसका वी.पी. देखि सुशीलसम्मको जति योगदान छैन नि । यो सामग्री रेसुङ्गा टुडे साप्ताहिकबाट साभार गरिएको हो ।

प्रतिकृया दिनुहोस्

इतिहासका निर्माता जनता हुन् भन्ने कुरा कालिकोटले पुष्टि गरेको छ : रणबिर

काठमाडौँ – स्थानीय तहको पहिलो चरणको निर्वाचन सम्पन्न भएर केही स्थानिय तहको नतिजा सार्वजनिक हुनेक्रम जारी छ । सरकारले गराएको स्थानिय तहको निर्वाचन नेत्रबिक्रम चन्द (विप्लव) नेतृत्वको नेपाल कम्युनिस्ट पार्टीले वहिस्कार गरेको थिया । निर्वाचन वहिस्कार गरेर खारेजिको अभियान चलाएको नेकपाले कालिकोटमा...

महिलामा सेवाको भावना धेरै हुन्छ ः रमला बराल (उपाध्यक्ष ने.नि.क.यु.सं.झापा)

स्वास्थ्य क्षेत्रमा महिलाहरु धेरै आकर्षित हुनुको कारण के हो ? महिला भनेको मानवीय नाता, दयालु भावना र कोमल हृदयको खानी हो । प्रकृतिको स्वभाव अनुसार नै यस्तो भावना पुरुषको तुलनामा महिलामा अत्यधिक हुन्छ । स्वास्थ्य क्षेत्रमा यी चिजहरुको महत्वपूर्ण भूमिका हुनुका साथै...

सुबोध देवकोटाको नेतृत्व क्षमताकै कारण दुई संगठन एक भएको हो ः विजयहरि शर्मा (निवर्तमान केन्द्रीय सल्लाहकार तथा महाधिवेशन प्रतिनिधि मोरङ ने.नि.क. यु. सं)

नेपाल निजामती कर्मचारी युनियन (संघ)को महाधिवेशन धेरै पटक स्थगित भइसकेको छ, तपाई केन्द्रीय सल्लाहकार हुनुहुन्छ, के सातौं महाधिवेशन अबचाँही तोकिएकै समयमा होला र ? हाम्रो संगठन प्रजातान्त्रिक पद्धतिमा विश्वास राख्ने संगठन हो । अब यस संगठनको तोकिएको समयमा किन महाधिवेशन हुन सकेन...

हाम्रो संगठनको केन्द्रमै गुट उपगुट देखियो ः रवीन्द्र श्रेष्ठ (केन्द्रीय पार्षद ने.नि.क. यु. सं इलाम)

नेपाल निजामती कर्मचारी युनियन (संघ)को सातौं महाधिवेशनको अन्योल कहिलेसम्म ? हाम्रो संगठनको केन्द्रीय नेतृत्वमा रहेका साथीहरु सबैले निर्वाचन आयोगले लगाएको आचार संहिता समाप्त भएको १५ दिनभित्र कुनै पनि हालतमा सातौं महाधिवेशन सम्पन्न गर्ने भनेर निर्णय भएको जनकारी हामीले पाएका छौं । विगतका...