‘जोसमा होस् गुमाउने’ सेन्चुरी बैङ्कका कर्मचारी कारागार चलान


मोटिभेट न्यूज सम्बाददाता
प्रकाशित मिति : शुक्रबार, मंसिर ३ २०७८
37.6K
SHARES

काठमाडौँ – जोसमा होस् गुमाएर बैंकिङ अपराध गर्ने सेन्चुरी कर्मसियल बैङ्कका एक कर्मचारी पुर्पक्षका लागि कारागार चलान भएका छन् । बैंक खातामा रहेको ग्राहकको रकम झिकेर बदामासी गर्ने सुनसरी स्थित चतरा शाखाका कर्मचारी केशब राई पुर्पक्षका लागि जेल चलान भएका छन् ।

उनीसँगै पक्राउ परेको ग्राहक पंकज न्यौपाने रिहा भएका छन् । सुनसरी जिल्ला अदालतले राईलाई पुर्पक्षका लागि कारागार चलान गरेको छ भने न्यौपानेलाई ५० हजार रुपैयाँ धरौटी लिएर छोडेको छ ।

के हो घटना ?

पंकज पक्राउ पर्नुको मुख्य अपराध उनले सेन्चुरी कर्मसियल बैङ्कमा खाता खोल्नु रहेको उनको परिवारले जनाएको छ । बैङ्कमा खाता खोलेर राम्रै कारोबार गरिरहेका उनीमाथि बैङ्कका कर्मचारीको आँखा पर्‍यो । हेर्दा, सोझो र इमानदार देखिएका पंकजसँग बैङ्कका कर्मचारीले सम्बन्ध बढाए ।

कर्मचारीसँगको त्यही संगतले उनलाई प्रहरी हिरासतसम्म पुर्याएको छ । यो घटना हालसालैको हो । बैङ्कको चतरा शाखामै पार्वती विष्टको पनि खाता छ । उनको खातामा विदेशबाट ठूलो मात्रामा रकम जम्मा भयो, ठूलो मात्रामा रकम जम्मा भएको बैङ्कका कर्मचारी केशव राईले जानकारी पाए ।

पैसा जम्मा भएको दिन पंकजसँग उनको भेट भयो । भेटमा राईले पंकजसँग उनको चेक मागे र खाली चेकमा हस्ताक्षर गर्न लगाए । सोझा पंकजले पनि खातामा पैसा नभएको भन्दै चेक दिन इनकार गरे ।

‘मेरो विदेशबाट पैसा आउँदै छ । तपाईँको खातामा जम्मा गर्न भन्छु । त्यसपछि कति पैसा आउँछ निकालौला । पैसा आउला, तपाईँलाई खोजेर नभेटौँला । मलाई यति सानो सहयोग गर्नुहोस् है पंकजजी’ भन्दै चेक मागेको पंकजको भनाई उदृढ गर्दै प्रहरी श्रोतले भन्यो । प्रहरीसँगको बयानमा आफूलाई पैसा जम्मा भएको, झिकेको केही पनि जानकारी नभएको बताएका छन् ।

‘मेरो खातामा पनि पैसा छैन भन्ने भयो । पैसा जम्मा हुँदा र झिक्दा के हुन्छ र भन्ने भएपछि मैले चेक दिएको हुँ’, प्रहरीसँगको बयानमा उनले भनेका छन् ।

खातामा पैसा नभएको हस्ताक्षरसहितको चेक प्राप्त गरिसकेपछि राईले विष्टको खातामा जम्मा भएको रकम पंकजको खातामा जम्मा गरे । र उक्त रकम दुई पटक गरी पंकजको खाताबाट चेकमार्फत निकाले ।

पैसा निकाल्न बैङ्कमा पुगेका विष्टले खातामा पैसा नदेखेपछि प्रहरीमा उजुरी गरे । उनको उजुरीका आधारमा बैङ्कका कर्मचारी राई र चेक दिने पंकजलाई प्रहरीले पक्राउ गरेको छ । अहिले प्रहरीले दुवै जनालाई हिरासतमा राखेर अनुसन्धान गरिरहेको छ ।

सेन्चुरी बैङ्क चतरा शाखाका शाखा प्रबन्धक तीर्थमणि काफ्लेले कर्मचारीको बदमासीका कारण निर्दोष व्यक्तिले दुःख पाएको स्वीकारेका छन् । ‘पंकज हामीले निकै नजिकबाट चिनेको व्यक्ति हो । उहाँलाई अनावश्यक रूपमा फसाइएको छ ।’ उनले भने, ‘हामीले यो केशमा उहाँको संलग्नता नभएको बताइसकेका छौँ ।’

प्रहरीले अनुसन्धान भइरहेकाले यस विषयमा केही पनि बोल्न नमिल्ने बताएको छ । ‘उहाँहरू दुई जनाको नाममा उजुरी परेको छ ।’ इलाका प्रहरी कार्यालय चतराका प्रमुख प्रहरी निरीक्षक पाण्डव राजवंशीले भने, ‘हामीले अनुसन्धानका लागि राखेका छौँ । अनुसन्धान भइरहेको छ । यस विषयमा धेरै बोल्न मिल्दैन ।’

बैङ्कको केन्द्रीय कार्यालयले यस विषयमा जानकारी भएको जनाएको छ । ‘पत्रिकामा समाचार आएपछि हामीलाई पनि जानकारी भएको छ । हाम्रै कर्मचारीले बदमासी गरेको भन्ने छ ।’ बैङ्कका ब्रान्ड तथा सिएसआर प्रमुख गणेश सुवेदीले भने, ‘अरू विषय मलाई जानकारी छैन । उहाँलाई कारबाही गरेको भन्ने पनि छ । तर कहिले र कुन तहको कारबाही हो मलाई जानकारी छैन ।’

बैङ्कका सूचना अधिकारी राजेश भण्डारीले यस विषयमा बुझ्न बारम्बार टेलिफोन गर्दा फोन उठाएनन् । फोन नउठेपछि उनलाई भेट्न कार्यालयमा पुग्दा पनि उनी भेटिएनन् । यो विषयलाई बैङ्कले गुपचुप राख्दै कर्मचारीको बचाउ गर्न खोजेको भण्डारीको व्यवहारले पुष्टि गरेको छ ।