‘क्यानडा पठाउने भन्दै, विद्यार्थी ठग्दै’ युरो ग्लोब कन्सल्टेन्सीका ‘राम शाह’

काठमाडौं – युरो ग्लोब एजुकेशन कन्सल्टेन्सी तथा करिअर्स डेभलपमेन्टका संचालक राम शाहले क्यानडा पठाइदिने भन्दै विद्यार्थी ठग्ने गरेको पाइएको छ । क्याानडामा दर्तासमेत नभएको भोकेशनल कलेजहरुबाट अफर लेटर मनाएको भनेर नक्कली अफरलेटर बनाई विद्यार्थीसँग लाखौं रकम अशुल्ने गरेको पाइएको हो ।

उनले क्यानडाको क्यानडियन टेक्नोलोजी कलेजमा भर्ना गरिदिने भन्दै एक सयभन्दा धेरै विद्यार्थीको रकम उठाएको पीडित विद्यार्थीले बताएका छन् । ‘राम शाहले विभिन्न बहानामा पैसा मागे, हामीले पनि भिसा लाग्ने भएपछि भनेजति पैसा दियौं ।’, मोटिभेट न्यूज डटकमको सम्पर्कमा आएकी एक विद्यार्थीले भनिन्, ‘अहिले भिसा रिजेक्सन भनेर आयो । त्यो कलेजमा कसैको पनि भिसा नलाग्ने रहेछ । हामीलाई भिसा ग्यारेन्टी भनेर ठग्यो ।’

उनले एक जना विद्यार्थीबाट तीन लाखसम्म रुपैयाँ उठाएको पीडित विद्यार्थीको भनाई छ । ‘पहिलो अफवेयरमा काम पनि पाइन्छ भनेर म जस्ता धेरै युवालाई प्रलोभन देखायो । त्यसमा भिसा नलागेपछि भोकेशनल कलेजमा पठाउने भन्यो ।’, उनले भनिन्, ‘अहिले त्यसमा पनि भिसा लागेन । राम शाह भन्ने मान्छे युवालाई ठग्न बसेको रहेछ । म जस्ता एक सयभन्दा धेरै विद्यार्थीलाई ठगेको छ ।’ ‘उसले भिसा आउँछ भनेर १ बर्षसम्म झुलायो । पैसा धेरै खर्च भयो । तर भिसा लागेन ।’, नाम उल्लेख नगर्ने सर्तमा उनले भनिन्, ‘भिसा नलागेपछि हामीले पैसा फिर्ता माग्यौं । हाम्रो खर्च भएको पैसा फिर्ता गर्न आनाकानी गरेको छ ।’

‘आफ्टर पे भिसा’ को नारा दिएर विद्यार्थी ठगिरहेको एक अर्का विद्यार्थीको आरोप छ । ‘भिसा लागेपछि मात्र पैसा पठाउने हो, अहिले कलेजमा पैसा पठाउनु पर्दैन भनेर सुरुमा फकायो ।’, पीडित विद्यार्थीले भने, ‘त्यो त उसको पैसा उठाउने धन्दा रहेछ । हाम्रो भिसा नलागेपछि मात्र हामीले चाल पायौं ।’ उनले प्रोसेसिङ गरिदिने भन्दै एक जना विद्यार्थीबाट ३ लाखसम्म पैसा लिने गरेको पीडितको भनाई । केही विद्यार्थीहरुले कार्यालय घेरेपछि कन्सल्टेन्सीले पैसा फिर्तासमेत गरिसकेको छ । ‘१०/१५ जना युवाहरु आएर अफिस घेरेपछि उनीहरुको पैसा फिर्ता गरेको छ ।’, अर्का पीडित विद्यार्थीले भने, ‘ठूलो स्वर गरेर कराएपछि पैसा दिने रहेछ । केही दिन अगाडि युवाहरुले प्रहरीकोमा बुझाएपछि उनीहरुको पनि पैसा फिर्ता गरेको थियो ।’

कन्सल्टेन्सी संचालक राम शाहले भने प्रमाणसहित विद्यार्थी आए आफूले पैसा फिर्ता गरिदिने बताए । ‘मलाई पैसा दिएको प्रमाणसहित आएको खण्डमा पैसा फिर्ता गरिदिन्छु ।’, उनले भने, ‘तर पैसा दिएकै छैन, नदिएको पैसा नै दिएको हो भनेर ब्ल्याकमेल गर्छ भने त्यो त राम्रो हुँदैन ।’ मोटिभेट न्यूजसँगको टेलिफोन संवादमा शाहले मोवाइलको स्कृनसर्ट आफूलाई मान्य नहुने बताए । ‘मलाई बैंकको स्टेटमेन्ट चाहिन्छ, मोवाइलको स्कृनसर्टले हुँदैन ।’, उनले भने, ‘उसले ल्याएको बैंक स्टेटमेन्ट र मेरो बैंक स्टेडमेन्ट म्याच गराएर मात्र पैसा फिर्ता गर्छु ।’

तर विद्यार्थीले बैंकमार्फत भन्दा पनि क्यास धेरै बुझाएको बताएका छन् । ‘हामीले बैंकमार्फत त थोरै पैसा पठाएको हो । उसले क्यास माग्ने गर्थ्यो, हामीले पनि भिसा लाग्ने आसले क्यास बुझाएका थियौं ।’, विद्यार्थीले भने, ‘मोवाइल बैंकिङको स्कृनसर्ट मान्दैन भन्नु ठगको भाषा हो । उसले विभिन्न बहाना बनाएर पन्छिन खोज्दैछ ।’ क्यानडियन टेक्नोलोजी कलेज क्यानडामा दर्ता भएको छैन । क्यानडामा बुझ्दा यो नामको कुनै पनि कलेज नभएको पाइएको छ । दर्ता नभएको कलेजमा विद्यार्थी पठाउने भन्दै शाहले विद्यार्थीबाट पैसा उठाएर ठगी गरेका तथ्यले देखाएको छ । शाहले भने अहिले उक्त कलेज बन्द भएको प्रतिक्रिया दिएका छन् । ‘हामीले राम्रै गर्न खोजेको हो । तर विद्यार्थीको भिसा लागेन । हामीले काम गर्ने क्यानडियन टेक्नोलोजी कलेज गएको अक्टोबरमा बन्द भयो । अहिले त्यो कलेज चालु छैन ।’, उनले भने ।

सुरुमा शाहले आईएलटिएस नचाहिने, अन्तरवार्ता नहुने, भिसा रेट उच्च रहेको र भिसा लागेपछि मात्र ट्युसन फि पठाउनुपर्ने भन्दै विद्यार्थीलाई प्रलोभनमा पारेका थिए । उनको प्रलोभनमा परेका विद्यार्थीहरुले आफूहरु ठगिएको आरोप लगाएका छन् ।